b14.21:Is 28.11-12

1 Corinthians 14

Nia wanga dehuia mai di Hagataalunga Dabu

1Ma go di aloho belee hagamahi ginai goodou. Gi haamanawa i nia wanga dehuia o di Hagataalunga, kaedahi la go di hagadele nnelekai kokohp a God. 2Digau ala e helekai i nia helekai henua gee, la hagalee helekai gi nia daangada, anga hua gi God, idimaa, ma deai tangada e iloo ia nia helekai aalaa ai. Go di Hagataalunga dela ne haga helekai a mee gi nia mee ala e de iloo nia daangada. 3Gei digau ala e hagadele nnelekai kokohp a God, le e hagi ang gi nia daangada, belee hagahumalia ge e haga manawa maaloo ge e haga tentene digaula. 4Ginaadou ala e leelee i nia helekai henua gee, le e hagamaamaa hua ginaadou. Gei ginaadou ala e hagadele nnelekai a God, le hagamaamaa di nohongo dabu hagatau. 5Au bolo goodou huogodoo gi mee di helehelekai i nia helekai henua gee, gei di mee dela koia e humalia la go goodou gi hagadele ina nia helekai kokohp a God. Idimaa, tangada dela e hagadele nnelekai a God, la koia e aamua i tangada dela e leelee i nia hagadilinga helekai henua gee, go di maa hua be tangada i golo e mee di hagadonudonu nia helekai tangada deelaa, gi iloo ang gi di nohongo dabu hagatau. 6Ogu duaahina nei, dogu hanadu gi godou baahi la dono hadinga aha maa au ga helehelekai henua gee? Hagalee, goau hua ne gowadu gi goodou nia hagamodongoohia mai baahi o God, be nia iloo nia mee, be nia helekai, be nia agoago.

 7E hai gadoo be nia mee hai daahili nadau mouli ai, be di mee ngiingii mo di ‘harp’. Maa nia lee o nia maa la ga hagalee tongaadahi, dehee laa di hai o tangada ga iloo ia be di maa di lee daahili behee dela e hai go nia mee aanei? 8Di labaa dauwa ma ga ili de modongoohia dono lee, malaa koai dela e mee di hagatogomaalia ia gi tauwa? 9E hai gadoo be goodou ma ga leelee i nia helekai henua gee, gei hagalee haga donu gi donu humalia, malaa koai dela ga iloo ia? Malaa godou helekai ala e hai, le e leelee hua balumee. 10Nia hagadilinga helekai e logowaahee i henuailala, gei nia helekai huogodoo la ono hadinga i golo. 11Maa au ga de iloo telekai tenua dela ne helekai ai, au e ala be tangada hua henua gee ni mee, gei mee tangada henua gee labelaa ni aagu. 12Idimaa goodou e hagamahi e hai mee gi nia wanga dehuia mai di Hagataalunga, goodou hagamahi gi hai mee gi nia wanga dehuia e hagatomo aga ai di o dabu.

 13Maa tangada e helekai i nia helekai henua gee, geia gi dalodalo i di hagamaamaa bolo gi mee hagadonudonu ana helekai. 14Maa au ga dalodalo i nia helekai henua gee, go dogu hagataalunga la hua ne dalodalo, gei au digi donu ginai. 15Dehee laa dagu mee ga hai? Au ga dalodalo gi dogu hagataalunga, gei au ga dalodalo labelaa gi agu maanadu. Au ga daahili gi dogu hagataalunga, gei au ga daahili labelaa gi agu maanadu. 16Ma go doo hagataalunga la hua dela e danggee ang gi God, gei digau ala i golo le e hai bolo “Amen” ▼
▼14.16Tadinga di bida helekaiamen le e hai bolo “e donu”
 behee, gi dau dalodalo danggee?Idimaa, digaula e de iloo au helekai. 17Maeaha maa dau dalodalo hagaamu a God le e humalia, gei hagalee hagamaamaa digau ala i golo. 18Au e danggee ang gi God i dogu iloo eau di leelee i nia helekai henua gee i goodou huogodoo. 19I lodo taumaha gei au gu hiihai huoloo bolo au e helekai hua i nia bida helekai e lima, ala koia e donu ginai nia daangada i lodo agu agoago, laa hongo nia bida helekai mana(1,000) e logo, i nia helekai henua gee.

 20Ogu duaahina nei, godou hagamaanadu gi hudee heia be nia maanadu dama. Goodou gi heia hua goodou be nia dama lligi i nia mee huaidu. Gei godou hagamaanadu gi heia be nia hagamaanadu daangada gu mmaadua. 21I lodo di Beebaa Dabu la gu hihi boloo:

“Dimaadua ga helekai bolo au ga helekai gi agu daangada aanei i nia helekai henua gee. Gei au ga helekai gi digaula mai i lodo nia malau ngudu o digau nnenua mai i daha, gei agu daangada ga hagalee hagalongo mai gi di au.” b
 22Di wanga dehuia o di helehelekai henua gee, la di haga modongoohia digau de hagadonu, hagalee digau hagadonu. Gei di hagadele nnelekai kokohp a God, la di haga modongoohia digau hagadonu, hagalee digau de hagadonu. 23Maa di nohongo dabu ga dagabuli gi di gowaa e dahi, ga daamada ga helehelekai i nia helekai henua gee, gei nia daangada digi iloo ginaadou nia agoago be e de hagadonu ga ulu mai, digaula hagalee ga helekai bolo goodou huogodoo e boiboi? 24Gei di maa huogodoo ga helekai i nia helekai kokohp a God, gei tangada dela dono hagadonu ai, be tangada dela digi longono ia di agoago, ma ga ulu mai ga hagalongono ia i deia i ono huaidu, mai i ana mee huogodoo ala ne longono ia. Geia ga bida hagi aga hua ia gi ana mee huogodoo ala ne longono ia, 25gei ana hagamaanadu nngala ala i ono lodo, la ga modongoohia aga, geia ga dogoduli gi lala, ga bala gi God, ga helekai boloo, “ Di God le e donu.”

Di haga nohonoho di hai daumaha

26Ogu duaahina nei, deenei di mee e helekai iei au, goodou ma ga dagabuli mai belee hai daumaha, tangada e daahili, tangada e agoago, tangada e hagadele nnelekai kokohp mai baahi o God, gei tangada e helekai i nnelekai henua gee, gei tangada e haga donu donu nia helekai ne helekai ai. Malaa, nia mee huogodoo aanei e hai belee hagamaamaa di nohongo dabu. 27Tangada ma ga helekai i nia helekai henua gee, dogolua be dogodolu e hagadau dagidahi e helekai, gei tangada i golo labelaa hagamodongoohia nia helekai ne helekai ai. 28Maa tangada i golo ai e mee di haga donusonu ana helekai, malaa tangada dela e helehelekai nia helekai henua gee, la gi noho dee muu, gi bida helekai hua ang gi deia mo ang gi God. 29Nia daangada dogolua be dogodolu i digau ala ne kae nadau helekai kokohp mai baahi o God, la gi hai nadau agoago, gei digau ala i golo la gi hagadina ina be digaula ne helekai bolo aha. 30Gei di maa tangada e noho i lodo di hale daumaha, gu kae nia helekai mai baahi o God, gei tangada dela e agoago la gi lawa, gi noho dee muu. 31Goodou huogodoo e mee di hagadele nia helekai a God, hagadau dagidahi, bolo huogodoo gi donu ginai gi kae nadau hagamaamaa. 32Di wanga dehuia o di hagadele nia helekai a God le e- huahua ai tangada dela e hagadele agoago nia maa. 33Idimaa, God la hagalee hiihai gidaadou gi noho i lodo di hinihini, gei gi noho hagadau buni mo i di aumaalia.

I lodo nia nohongo dabu huogodoo o nia dama a God, 34nia ahina gi noho deemuu i lodo di haga dagabuli o nia nohongo dabu. Digaula hagalee dumaalia ginai gi helekai, gi hai be nnaganoho o digau o Jew bolo digaula hagalee dagi. 35Maa digaula e hiihai gi iloo, gi heeu ina gi nadau lodo i di hale, idimaa, e haga langaadia go di ahina ma ga helekai i lodo tagabuli di nohongo dabu.

 36Nia helekai a God la ne daamada mai i godou baahi, be ne gowadu hua gi goodou? 37Maa iai tangada gu hagamaanadu bolo ia tangada kae hegau ni God, be tangada gu kae di wanga dehuia di Hagataalunga Dabu, mee gi donu ginai bolo nia mee ala gu lawa i dagu hihi adu gi goodou, la nia haganoho Tagi. 38Gei mee ma ga haga de iloo ia nia helekai aanei, goodou haga de iloo ina a mee.

 39Ogu duaahina nei, goodou gi haga dahidamee ina, hagadele ina nia helekai kokohp a God, gei goodou hudee bule ina nia helehelekai henua gee. 40Nia mee huogodoo e hai gi lawa i lodo di ala e tau anga, gei e haga noho gi humalia.
Copyright information for KPG